Nunaqarfiit arfineq-marluk aqquserngi nutarsarneqartut

Avannaata Kommuniani nunaqarfinnit 21-usunit arfineq-marluusut aqquserngisa nutarsarneqarnissaannut ukioq manna 1,5 millioner koruuninik immikkoortitsisoqarpoq. Nunaqarfiit ilaat betonimik kuisanik aqqusinniorfigineqassapput, allat ujaraaqqanik sioqqanillu aqqusinniorfigineqassapput allallu akuleriinnik aqqusinniorfigineqassallutik.

- Nunaqarfitsinni aqquserngit ajorluinnaqqissaartut qamutinut motoorilinnut, soorlu ATV-nut aamma nivattaassuarnut ilaatigut eqqagassalerinermi atorneqartartunut aserortuukulatitsisarput. Qamutit motoorillit aserortoornerisigut eqqagassalerineq unitsikulaneqartarpoq, taamaasillunilu innuttaasunut ajornartorsiulersitsisumik eqqagassat qaleriiaatiinnalersarlutik, Mogens Holmegård Mortensen, Avannaata Kommuniani sanaartornermut ingerlatsisutut atorfeqartoq oqarpoq.

Nunaqarfiit Aappilattoq, Kullorsuaq, Nuussuaq, Tasiusaq, Upernavik Kujalleq, Ilimanaq aamma Ukkusissat aqquserngi 2021-mi nutarsaavigineqassapput. Nunaqarfiit ilaanni sivingajaartuni aqqusinniortoqassaaq. Aqquserngit 2 meteriniit 3 meterit angullugit silissuseqassapput nunaqarfinnilu pisariaqartitsineq aallaavigalugu takissusilerneqassallutik.

- Assersuutigalugu kommunimit sanaartugassanik suliassinneqartartup Ilimanami sulisartut ikiortigalugit aqqusinniorluni aallartitsivoq, kingornalu sulisartut Ilimanarmiut inaarsaallutik. Taamatut aamma Upernaviup eqqaani ingerlatsiniarpugut. Taavani sanaartugassanik suliassinneqartartoq nunaqarfinniit nunaqarfinnut angalalluni nunaqarfinni sulisartut ikiortigalugit aqqusinniornernik aallartitsisarniarpoq, sulisartullu nangitsillutik inaarsaasassapput, Mogens Holmegård Mortensen oqarpoq.

Mogens Holmegård Mortensenip naatsorsuutigaa, aqqusinniornerit ukioq manna imaluunniit aappaagu aasaanerani naammassineqarsinnaassasut.

Aappilattumi 161-inik inoqarpoq, Kullorsuarmi 437-t, Nuussuarmi 191-it, Ilimanami 52-it, Ukkusissani 151-it, Upernavik Kujallermi 207-t kiisalu Tasiusami 259-it.

Allattoq: Káte Hansen, khan@avannaata.gl
Assit: Mogens Holmegård Mortensen