- Ataatsimiititaliani missingersuusiasi misissorlugit qaammat ataaseq piffissaralugu ulapittussanngorpusi, sulilluarisi!
Borgmesteri Palle Jerimiasseni taama oqaaseqarluni, kommunip 2022-mut missingersuusiaasa kommunalbestyrelsimi eqqartorneqarnerisa naammassineqarnerat nalunaarutigaa. Ataatsimiititalianimi ilaasortat 2022-mut missingersuusiatik nalilersoqqillugit aningaasanik atunngisanik ujaasillutillu pingaarnersiuillutik suliaqarnissaannik Aningaasaqarnermut Ataatsimiititaliamit inassuteqaat kommunalbestyrelsimi ilaasortat isumaqatigiissut taperserpaat, tamatumanilu eqqarsarluarnikkut aningaasaqarniarnermik aammalu aningaasanik uninngasuutinik qulakkeerinninnissaat siunertaralugu missingersuusianik misissuissapput.
Kommunimi aningaasaqarnikkut naatsorsuinermi atortut nutaat atorneqalerneranni periuseq tamanna 2021-mut missingersuusiornermi atorneqareersimavoq, tamannalu kommunalbestyrelsimi ilaasortanit iluarisimaarneqarluarpoq.
Missingersuutit nalilersoqqinneqartut
- Kommunitta oqaluttuarisaanerani siullerpaamik isertitatigut 1 milliard koruunit qaangerlugit missingersuusiorpugut. Tamatuma takutippaa aningaasaqarnermik ingerlatsinerput ajunngitsoq. 83 millioner koruuninik sanaartornermut missingersuusiaqarnerput aallaavigalugu aningaasaqarniarnitta nukittorsarnissaa eqqarsaatigilluartariaqarparput. Kissaativut tamaasa piviusunngortissinnaanngilagut, taamaammallu isertitagut kisiisa isumalluutigisinnaanngilagut. Innutaasut atugaannik ajorseriartitsinngikkaluarluta suleriaatsit nalimmassarlugit suleqatigiilluta nammaqatigiittariaqarpugut, Avannaata Kommuniani borgmesteri Palle Jerimiassen kommunip 2022-mut missingersuusiaasa siullermeerutaasumik eqqartorneqarneranni oqarpoq.
Taamaammallu kommunip aningaasaqarniarnerata najummassimanartorsiornera pissutigalugu kommunimi ingerlatsiviit missingersuusiaminnik aammaloortumik nalilersuinissaat kissaatigineqarpoq, ataatsimiititalianilu innersuussutaasut tunngavigalugit aningaasat tigoriaannaat 42 millioner koruuninik qaffanneqarput, taakkunannga 35 millioner koruunit Akileraartarnermut Pisortaqarfimmeersuullutik. Taamaasilluni kommunimi 2021-p naanissaanut aningaasanik tigoriaannagassanik 44,9 millioner koruuninik qulakkeerinnittoqarpoq, taakkulu 4,7 %-inik naleqartut kommunip aningaasanik taarsigassarsinerani 5 %-inik aningaasanik uninngasuuteqarnissamut Aningaasaqarnermut Pisortaqarfiup piumasaqaataanit appasinnerulaarput.
2022-mut aammalu 2023-miit 2025-mut ukiuni ikaarsaariarfiusussani missingersuutit ataatsimiititaliani suliarineqartussanngorlugit ingerlateqqinneqarput, taamalu missingersuutit aappassaaneerneqarnissaasa tungaannut aammalu aningaasat uninngasuutit 47,9 millioner koruunit suli patajaallisarneqarnissaat anguniarlugu ataatsimiititaliat qaammat ataaseq piffissaralugu aningaasaqarniarnertik misissuivigeqqissavaat.
Allattoq: Káte Hansen, khan@avannaata.gl