Kommunimut pilersaarummut tapiliussaq nr. 29
Kommunip pilersaarutaanut tapiliutip siunertaa
Kommunimi tapiummut siunertaq tassaavoq nunatami sillimaniarnikkut killeqarfiup iluani immikkoortoqarfimmik mikinerusumik atugassiinissaq, aammalu illuaqqap atorneranut, kiisalu illuaqqap angissusianut, inissisimaffianut isikkuanullu tunngatillugit pissutsinik inatsisilersuisunik immikkoortumut aalajangersakkanik aalajangiinissaq.
Kommunip pilersaarutaanut tapiummut siunnersuutip tamanut ammasumik tusarniaanerup nalaani maalaarut ataaseq, kiisalu kommunip pilersaarutaanut tapiutip imarisaanik erseqqissaassutinut allannguutinullu siunnersuutialuit takkussimapput.
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup pingaartitaa tassaavoq Ilulissat Kangiata eqqaani nunatami sillimaniarnikkut killeqarfimmut siunertap tassaanera sumiiffiup Outstanding Universal Value‘ata (Assissaqanngitsumik Tamatigoortumik Naleqassusiata) attanneqarlunilu illersugarinissaa, aammalu nunaminertami sillimaniarnikkut killeqarfik sapinngisamik siamasissuutitamik illuliorfigineqaranilu ingerlatsivinnik peqartinnginnissaa. Taamaattumik sillimaniarnermut killeqarfimmi namminersuutigisamik illuliarisap inatsisitigut unioqqutitsiunnaartitsinermik ataasiartumik pisoqartuusoq kommunip pilersaarutaanut tapiummi inaarutaasumi erseqqissaavigineqarpoq, aammalu angallatinik motoorilinnik illuaqqamut tikitaqartarneq nunaannarmi angallatinik motoorilinnik atuinermut kommunip ileqqoreqqusaa malillugu pisassasoq. Tamatuma saniatigut illuaqqap pioreersup saniatigut immikkoortoqarfiup atugassiaqarfiusup iluani ingerlatsivinnik imaluunniit illualianik suli amerlanernik pilersitsinissamut periarfissaqassanngitsoq kommunip pilersaarutaanut tapiutip inaarutaasup attappaa.