Meeqqat inuusuttullu qinikkanut innuttaasunullu oqariartuutaat ersaripput, Ilulissani 2022-imi meeqqat ataatsimeersuartinneqarneranni ataatsimoorluni aalajangersagaq saqqummiunneqarmat: ”Silaannaap allanngoriartornera pillugu qanoq iliuuseqannginnissatsinnut ilisimasaqarpallaarpugut.” Ataatsimoorluta iliuuseqartariaqarpugut, taama meeqqat oqariartuuteqarput.
”Sooq ikummatissamik taama annertutigisumik atuisariaqarpugut, silaannarsuatta ”ameraasaanik” ozon-imik annertunerujartuinnartumik putoorisumik, silaannaallu paatsiveerukkaluttuinnarneranut pissutaasumik?” taama aalajangersakkaminni meeqqat qinikkanut aperipput. Siunnersuutigaat assersuutigalugu bussit innaallagissamoortut ukkanneqarnerulissasut, suliartornermilu mingutsitsisunik biilinngikkaluarluni sikkilertoqarsinnaasoq.
Najukkani qinikkat Naalakkersuisullu meeqqanit aperineqarputtaaq, Kalaallit Nunaanni innaallagissiornermi sooq imeq, anori immallu nukigat atorneqarnerunnginnersut. ”Sunaana utaqqigipput?” Ilulissani kultoorikkut illorsuarmi taama aperipput.Avannaata Kommuniani meeqqat nuna tamakkerlugu Meeqqat Isummersorfiineersur meeraqatitik peqatigalugit 2022-imi NAKUUSA-p TV-iikkut attaveqaatit atorlugit ataatsimeersuartinneqarneranni peqataasimapput. Ataatsimeersuarnermilu inernerit maanna kommunimi qinikkanut avitseqatigiissutigineqarput.
”Inuusuttut nalaarnissaat pingaartuuvoq, suliaallu ajasoorutigaakka. Qinikkat akornanni isumaqatigiissutaavoq, Avannaata Kommuniani suliassaqarfiit, inuusuttunit aamma tikkuarneqartut, ukkatarineqarnerulernissaat.” Taamatut oqarpoq Avannaata Kommuniani Borgmesteri Palle Jerimiassen.
Borgmesterip meeqqat najukkaminni pissutsinik eqqummaariffiginninnerat pillugu qutsavigai, NAKUUSA-llu naqitertissimasaani aappaluartumi meeqqat kissaataannik imaqartoq tigullugu.
”Avannaata Kommuniata anguniagaani allassimavoq Ilulissat ukioq 2030-imi CO2 pillugu oqimaaqatigiissumik atuiffiulersimassasoq, qinikkallu eqqumaffigilluinnarpaat, piujuaannartitsineq tunngavigalugu ineriartortitsissallutik. Pingaartuuvoq tamatta iliuuseqaqataanissarput.” borgmesteri erseqqissaavoq.
Atuartuttaaq inersuarmi apeqqutit tamakku tusarnaarpaat.
”Sooq atoqqiisarsinnaaneq taama pikkorluffigitigivarput? Suulluunniit atorfissaarussatta ilarpassui allanit nuannaarutaallutik atoqqinneqarsinnaalluaraluarput.” taamatut meeqqat ilaatigut oqariartuuteqarput.
Qulequtarineqartut ilagaat eqqakkanik immikkoortiterisarnissaq
Meeqqanit kissaatigineqarpoq eqqakkat annertunerusumik immikkoortiterneqartalernissaat eqqakkanillu ikuallaaneq illunik kiassaanermut iluaqutigineqartariaqartoq.
Tamannarpiarlu, tassa eqqakkanik immikkoortiterisarnissaq, 2023-imi Avannaata Kommuniani ukkatarineqarniarpoq. Ilulissani sumiffinni arlalinni eqqaavissuit igalaaminernut saviminernullu atugassiat inaalinneqarput. 2023-imi aama annertunerusumik ukkatarineqarniarpoq eqqakkat immikkoortiterneqartarnissaat kiisalu eqqakkanik navianartunik tunniussisalernissaq. Tamakku tassaasinnaapput batterit atornikut, mikisut angisuullu, soorlu biilinit/umiatsianit/qamuteralanneersullu, akuutissat, uuliakut, seqqarsaatikut, qalipaatit puuku, uuliakoorfikut il.il. soorlu aamma elektronik-imut tunngasut.
2023-ip ingerlanerani eqqakkanut navianartunut tigooqqaaviit mikinerusut Qaanaami, Upernavimmi, Ilulissani Kullorsuarmilu pilersinneqassapput. Inoqarfiit sinnerini Sullissivik eqqakkanut isumaginnittuussaaq. Innuttaasutut eqqakkanik navianartunik tunniussinermi akiliisitaassanngilatit.
Meeqqat iliuuseqarnermikkut aqqutissiueqataapput
Ilulissani kultoorikkut illorsuarmi aaqqissuussisoqarmat paarnat isseranik imeruersaatigineqartup imertaata imaani nilanneersuunissaat meeqqat namminneerlutik isumagisimavaat, taamatuttaarlu kalaalimernit, soorlu puisip orsua, saarullik panertoq, qilaluamineq ammassaallu sassaalliutigineqarlutik.
”Sooq tamakku Nunatsinni pigeriikkagut atunngilagut? Nunatsinni uumasut, ileqqugut, nerisassagut atortussiassagullu soormi atornerunngilagut, taamaalilluta avataaniit tikisitsiortornerput annikillisillugu? Najugarisatta tunniussarisinnaasai toqqammavigalugit nerisaqarsinnaavugut, sanaartorsinnaavugut pilersitsisinnaallutalu. Taamaaliornitsigut namminerisatsinnik ileqqugut tulluusimaarutiginerulersinnaavagut pilersitsinitsigullu nuannaarnerulersinnaalluta.” taama meeqqat oqariartuuteqarput.
Avannaata kommuniani Meeqeqat isummersorfii-nik marlunnik peqarpoq – Ilulissani Qaanaamilu. Meeqqat atuarfiini arlalinni sumiiffinni Nakuusaaqqat piupput.
NAKUUSA-p siunertara meeqqat inuusuttuaqqallu kommune-mi aalajangeeqataasarnissat sunniuteqarnissaasalu qulakkeernissaat.
Avannaata Kommuniani NAKUUSA-mik suleqatiginninnissamik nutartereqqammerpoq 2023-2025-mut atuuttussamik.
