Avannaata Kommunia avinneqaraluarpat sunik kinguneqaateqarsinnaanersoq qulequtarineqarluni Uummannami innuttaasunik ataatsimiisitsineq 5. oktober 2024 ingerlanneqarpoq. Nalunaarusiaq siullermik saqqummiunneqarpoq 2024-imi septemberip aallartilaarnerani, tulliullutillu Qaanaaq Ilulissallu saqqummiivigineqassapput.
Borgmester Palle Jerimiassen innuttaasunik ataatsimiisitsisuuvoq. Nalilersuinerit assigiinngitsut kukkunersiuisarfimmit BDO-mit nalunaarusiarineqarsimasut saqqummiuppai. Kommunip BDO qinnuigisimavaa, naatsorsueqqullugu nalilersueqqullugulu, kommunip avinneqarnissaanut tunngasunik.
Arfininngornermi silagilluni seqinneraluartoq innuttaasunik ataatsimiisitsineq inuppassuarnit peqataaffigineqarpoq. Tusarnaartoqarpoq apersortoqarlunilu kisitsisit naatsorsuinerillu saqqummiunneqartut pillugit. Nalunaarusiaq arlalinngorlugu naqiterneqarsimasoq innuttaasunit angerlaanneqarsinnaasunngorlugu saqqumitinneqarpoq, taamaalillutik piumasut angerlarlutik eqqissillutik kommunip avinneqarsinnaanera pillugu isummersorsinnaassammata.
Innuttaasunik ataatsimiisitsineq immiunneqarpoq, taamaattumillu linki una https://youtu.be/wu2Eg2nIyXU toorlugu video isiginnaarlugulu tusarnaarsinnaavat.
Aamma nalunaarusiaq aasinnaavat/imaluunniit atuarsinnaavat Avannaata Kommuniata nittartagaani BDO rapport (avannaata.gl)
Seqersittagaq atorlugu saqqummiussineq (powerpoint-præsentationen) imaqarpoq kukkunersiuisarfiup BDO-p nalunaarusiaata imarisaasa ilaanik, taannalu innuttaasunik ataatsimiisitsinerni Avannaata Kommuniani borgmesterip Palle Jerimiassen-ip saqqummiussinermini atortarpaa, taamatullu aamma 2024-ip ukiaani nunaqarfinni siulersuisunut ilaasortanut kommunalbestyrelsimilu ilaasortanut.
Una aamma atuarsinnaavat: Avannaata Kommunia skal måske deles
