Eqqumiitsuliornermut Aningaasaateqarfik nunatsinni eqqumiitsuliornermik inuussuteqartut tapersersorusuppaat taamaattumillu eqqumiitsuliortut Kalaallit Nunaanni najugallit eqqumiitsuliornermut suliaqartunut tapiissutinik, eqqumiitsuliortut qaammammut isertitaqalernissaannik qulakkeerinnittunik, qinnuteqaateqarnissaminnut periarfissaqarput.
Eqqumiitsuliornermut Aningaasaateqarfik marlunnik tapeeriaaseqarpoq:
- eqqumiitsuliornikkut sulialinnut tapiissutit
- eqqumiitsuliornikkut tapiissutit
Eqqumiitsuliornikkut sulialinnut tapiissutit
Eqqumiitsuliornermut suliaqartunut tapiissutit inuussutissarsiutigalugu eqqumiitsuliornermik suliaqartunut pilersitsisunullu tunniunneqartarput.
Aammalu periarfissaavoq eqqumiitsuliortutut piukkunnartunut qaammammut akissarsiassaat qulakkeerniarlugit tunniunneqartarlutik.
Qinnuteqarniaruit Kalaallit Nunaanni aalajangersimasumik najugaqassaatit makkunanilu eqqumiitsulioriaaseqassallutit:
- illussanik titartaaneq
- assilissanik eqqumiitsuliorneq
- filmiliorneq
- assassukkanik eqqumiitsuliat ilusilersuinerlu
- atuakkiorneq
- nipilersorneq
- isiginnaartitsineq
Una toorlugu qinnuteqarnermi maleruagassat atuarsinnaavatit
Eqqumiitsuliornermut suliaqartunut tapiissutit qaammammut 26.000 kr. naleqarput.
Tapeeriaaseq qinnuteqarfissat toqqaanialerukku, tapeeriaatsit assigiingissutaat atuaqqaarsinnaavatit, taamaasillutit qinnuteqarnermi immersugassaq eqqortoq qinnuteqarfissiani toqqassavat.
Eqqumiitsuliornikkut sulialinnut tapiissutinik qinnuteqarusuppit, qinnuteqarnermi immersugassaq immersoriarlugu takussutissiallu pisariaqartut kakkiussinnarlugit qinnuteqaatit nassiutissavat.
Takussutissiat pisariaqartut ukuusinnaapput:
- suliniummik allaaserinninneq
- suliniummi peqataasut pillugit paasissutissat
- isumaqatigiissutit
- Suliniummut pingaarutillit takussutissiat pisariaqartut allat ilanngunneqarsinnaapput
Eqqumiitsuliornermut aningaasaateqarfimmut qinnuteqaatit Sullissivik aqqutigalugu nassiunneqartarput. Qinnuteqaatit nassiukkukku, qinnuteqaatip tinguneranut uppernarsaammik nassiussiffigineqassaatit.
Eqqumiitsuliornermut aningaasaateqarfiup qinnuteqartutut allattorsimasuutigilerniarlutit, paasissutissat ilinnut tunngasut nalunaarsussavai. Qinnuteqaativit suliarineqarnissaanut paasissutissat tunniussatit pisariaqarput, sullinneqarnernilu pisariaqalissappat attaveqarfigineqarsinnaaniassagavit.
Qinnuteqarfiup piffiani illit kalaallit nunaani aaliangersimasumik najugaqarlutit uppernarsassavat.
Eqqumiitsuliornikkut sulinermut tapiissutinut qinnuteqarnermi, eqqumiitsuliortunut tapiissuteqarnerup nalaani tamakkiisumik suliffeqarnikkut akissarsiatigut peqatigitillugu aningaasarsialinnut imaluunniit pisortanit aningaasanik tigusisartunut inuuniarnikkut aningaasartuutit matussusernissaanik tamakkiisumik siunertalinnut tunniunneqarsinnaanngillat, tingusartagaqannginnissat uppernarsassavat.
Qinnuteqaativit suliarineranut siunnersuutit pitsaasut:
Suliniut naatsumik ersarissumillu qinnuteqaasiarissavat. Tapiissutinik qinnuteqarnerni pingaaruteqarpoq suliniummut allaatiginninnerit paasiuminarsagaassasoq, suliniut sumut tunnganersoq suliniullu sooq pingaaruteqarnersoq ersarissumik Eqqumiitsuliornermut aningaasaateqarfimmut paasissutissiissutigissavat.
Aningaasaateqarfik tapiissuteqassagaluarpat ersarissumik eqqortumillu tapiissutit qanoq annertutigissanersut paasissutissiissutigilluassavat. Suliniut annertuppat aningaasaateqarfinnullu allanut tapiissutinik qinnuteqarsimaguit, qinnuteqaasiornerni suliniut agguarukku iluaqutaassaaq.
Eqqumiitsuliornermut aningaasaateqarfiup siunertaa, ilinnut suliniummullu piumasaqatai pingaarnerpaavoq paasilluarsimassagitit.
MitID-qarpit, eqqumiitsuliornermut suliaqartunut tapiissutinut qinnuteqarnermi immersugassaq elektronikkikkut immersorsinnaavat, takussutissiallu pisariaqartut kakkiullugit, taamaasillutit attaveqaatitigut ingerlaannaq qinnuteqaatit nassiutissavat.
NemID-mik peqanngilit, qinnuteqarnissamut immersugassaq immersorsinnaavat, immersoriarlugu allanik pappialanik pisariaqartunik kakkiussillutit uunga nassiussissaatit: kultur@nanoq.gl
Uani eqqumiitsuliornermut suliaqartunut tapiissutinut qinnuteqarnermi immersugassaq aajuk.
Malugiuk
Qinnuteqaatit fax-ikkut nassiussinnaanngilat.
Suliamik paasisimasallit eqqumiitsulioriaatsimi ilisimasaminni qinnuteqaatinik tiguneqartunik nalilersuissapput aammalu tapiissutinik agguaassisarneq, matumani tapiissutit angissusiat, ilusiat piffissarlu tapiissuteqarfiusoq pillugit Eqqumiitsuliornermut Aningaasaateqarfimmi siulersuisunut inassuteqaasiussallutik.
Sulianik paasisimasalinnit inassuteqaatit tunngavigalugit siulersuisut tapiissutinik tunniussissapput. Suliamik paasisimasallit inassuteqaataannut siulersuisut pisussaaffeqanngillat.
Naatsorsuutigissavat qinnuteqaativit suliarineqarnera tiguneqarneraniit sapaatit akunneri ikinnerpaamik 6-it qaangiuppata aatsaat piareerneqarluni akineqarsinnaammat. Taamaattumik qinnuteqaatinnut tunngatillugu apeqquteqarfigineqarnissat naatsorsuutigissavat aammalu aningaasanik atuinissaq eqqarsaatigalugu qinnuteqaativit piffissaagallartillugu nassiunnissaa isumagissavat.
Naatsorsuutigissavat eqqumiitsuliornikkut sulialinnut tapiissutit siusinnerpaamik qaammatit marluk taperneqarnissamut akuersisoqarneraniit pisartagarilersinnaagakkit.
Suliniutinut tapiissutinik tigusisimaguit suliniutip naammassinerata kingorna kingusinnerpaamik qaammatit pingasut qaangiunnerisigut tapiissutit suliaqarnermi atorneqarnerinut nalunaarusiamik atsiukkanik Eqqumiitsuliornermut Aningaasaateqarfimmut nassiussissinissannut pisussaatitaavutit.
Aningaasat eqqumiitsulianik ingerlatsinernut atunngikkukkit tapiissutit uterteqquneqarsinnaapput.
Tapiissutisiarisimasatit tamakkiisumik imaluunniit ilaannakorlugit utertinneqarnissaat pisinnaavoq, ima pisoqarsimappat:
- Illit tapiiffigineqartoq, tapiiffigineqarnissamut piumasaqaataasut naammassisinnaajunnaarukkit.
- Illit tapiiffigineqartoq, tapiissutitut akuersissutigineqartunut piumasaqaatigineqartut naammassisinnaajunnaarukkit.
- Illit qinnuteqartoq, eqqunngitsunik paasissutissiisimaguit.
- Illit tapiiffigineqartoq, paasissutissanik pingaarutilinnik nassiussinissamik itigartitsisimaguit, taakkununngalu ilaavoq nalunaarusiaq.
Qinnuteqarnissamut killiliussaapput 1. februar, 1. maj, 1. august aamma 1. november.
Eqqumiitsuliornermut aningaasateqarfimmiit aaliangerneq allaffissornermi pisortanut / oqartussanut allanut naammagittaalliutigisinnaanngilat, eqqartuussivimmulli ingerlateqqissinnaavat.