Ilinniartitsisutut atorfinnut qinnuteqaatit ukioq manna amerlasimapput, taamaammallu timelærerinik atorfinitsitsinani ilinniartitsisutut ilinniarsimasunik atorfinitsitsisoqarsinnaasimavoq. Illoqarfimmi atuarfinni marluusuni 641-nik atuartuutilinni ilinniartitsitsisutut atorfiit 73-it tamarmik inuttalerneqarput. Tamatuma saniatigut atualerlaani ilinniartitsisutut atorfiit arfineq-pingasut perorsaasutut ilinniarsimasunik inuttaqartinneqarput kiisalu najugaq qimannagu ilinniartitsisunngorniat pingasut timelæreritut atorfeqartinneqarlutik.
- Ilinniartitsisut eqqarsaatigalugit atorfinitsitsiniarlutalu atorfeqaannartitsiniarluta suliniutinik assigiinngitsunik ukiuni kingullerni aallartitsisimagut. Assersuutigalugu atuarfinnut siunnersortinik atuarfilerinermilu ingerlatsisunik atorfinitsitsisimavugut atuarfinni pisortat allaffissornikkut suliaannik oqilisaasinnaasunik, taamaasillutik atuarfinni pisortat suliassavimminnik aallutaqarsinnaalersillugit, tassalu ilinniartitsisunut qullersatut. Tamatuma saniatigut atuarfinni pisortat tarnip pissusiinik ilisimasalimmik siunnersuisinnaasumik oqaloqateqarnissaannut periarfississimavagut kinguneqarluartumik. Aamma atuarfilerinermi ingerlatsisut atuarfinnut sapaatip akunnikkaartumik attaveqartarput, taamalu ajornartorsiutaasinnaasunik pinaveersaartitsisoqarsinnaalluni, Aka Grønvold, Avannaata Kommuniani Ilinniarnermut Ingerlatsivimmi pisortaq unnersiorpoq.
Inissaqartitsiniarneq ajornartorsiutaasoq
Avannaata Kommuniani aamma atuarfinni pisortanik ukiumoortumik isumasioqatigiissitsisoqartarpoq. Ilinniarnermut Ingerlatsivik kingullertigut aamma ilinniarnermut siunnersortimik atorfinitsitsivoq, taassumalu atuarfinni atuartitsiseriaatsip pitsanngorsarneqarnissaa pingaarnertut suliaraa.
- Taamaammat ilinniartitsisut atorfinnut qinnuteqartartut atuarfinni avatangiisitigut atukkatigullu suliffigissaanikkut pimoorussilluta suliniuteqarnerput ilisimaaraat. Inissaqartitsiniarnerli ajornartorsiutiginerpaavarput. Illoqarfimmili unnuisarfinneersut coronamik nalaataqarneq pissutigaugu takornarianut ininik attartortitsisinnaanngitsut aqagu isumaqatiginninniarfigalugit aallartissavagut, pisortaq Aka Grønvold oqarpoq.
Perorsaasut sinnillit
Ilinniartitsisut assiginagit perorsaasutut atorfiit tamarmik Ilulissat Kommuneqarmalli inuttaqartinneqartuarsimapput. Ullumikkullu ulluunerani paaqqinnittarfinni perorsaasutut atorfillit sinneqartut atorfeqarput.
- Taamaasilluta inikkaani perorsaasunik marlunnik atorfinitsitaqarpugut, uffa nalinginnaasumik inikkaani perorsaasoq ataasiusaraluartoq. Taamaammat nukangasunik qitornallit ulluunerani paaqqinnittarfiliaassigunik perorsaasumut ilinniarsimasumut tunniussinissartik qularissanngilaat, Aka Grønvold oqarpoq nangillunilu:
- Ilulissani perorsaasutut atorfiit tamakkerlugit inuttaqartinneqarnerannut Perorsaanermik Ilinniarfiup Ilulissani inissisimanera pingaarnertut peqqutaavoq. Ilinniartut ilaqutallit ilaat illoqarfinnit allaneersut ilinniakkaminnik naammassinnikkaangamik uninngaannartarput. Aamma Ilulissat immikkuullarissunik avatangiisiliuvoq illoqarfillu ineriartorfiummat soqutiginartorpassuarnik pisoqarfiuvoq. Perorsaasut illoqarfimmut ussagarnerat aamma ilaatigut pissutigalugu periutsitigut assigiinngitsutigut Ilinniartitaanermut Naalakkersuisoqarfimmit isumasiorfigineqallattaasarpugut.
Ilulissani meeraaqqeriviit marluk, meeqqeriviit pingasut, akuleriinnik akiulinnut meeqqeriviit marluk kiisalu atuareernerup kingorna ornittakkat marluk ulluunerani paaqqinnittarfittut periarfissaapput. Paaqqinnittarfinni quliusuni perorsaasutut ilinniarsimasunut atorfiit 38-upput perorsaasulli ilinniarsimasut 40-t atorfeqartinneqarlutik.
Allattoq: Káte Hansen, khan@avannaata.gl