Eqqakkat immikkoortitaannaat
Siunissami eqqakkat eqqortumik immikkoortitersimasut kisimik tunniunneqarsinnaalissapput. Tamakku tigooraavimmit misissorneqartassapput, tassani lastbiilit eqqakkallu ataatsikkut oqimaalutarneqartassallutik. Eqqakkat eqqortumik immikkoortiterneqarsimanngippata, lastbiilinik aquttoq eqqakkanik maleruagassaq naapertorlugu, igitsiniaraluarnera itigartinneqassaaq eqqagassaatilimmullu utertinneqarluni, eqqagassat immikkoortiteqqaaqqullugit piumaffigineqarluni.
Tigooraavimmi biilertoq ilitsersorneqareernerup kingorna uppernarsaammik tunineqassaaq eqqaavissuarmi takutinneqartussamik, eqqakkat toqqorallarneqasinnaasut pineqarpata. Tassani biilertoq eqqakkat sumut niuneqartussaanerannit innersuunneqassaaq aappassaaneerlunilu eqqakkat niuneqarnerini eqqortumik immikkoortiterneqarsimanersut misissorneqaqqissapput.
Niuneqarnerisa kingorna paasineqaraluarpat eqqakkat eqqortumik immikkoortiterneqarsimanngitsut, 6000 koruuninik kukkusumik immikkoortiterineq pillugu akiliisinneqarnissaq piumasaqaataasinnaavoq.
Kukkusumik immikkoortiterineq akisoqaaq
Kommuni siornatigut aningaasarpassuit nukippassuillu atorlugit eqqakkat eqqortum ik immikkoortiterneqanngitsut, immikkoortiteqqittarnerat suliarisarsimavaat. Kommunimi eqqaavilerisut taamaalillutik immikkut suliassaqalersarput, taamalu iliortarnerat suliassanut allanut kinguarsaataasarpoq. Tamakku saniatigut kukkusumik immikkoortiterisarneq pillugu eqqakkat atoqqinneqarsinnaanerat akornuserneqartarpoq.
- Eqqakkat ilaat, Danmarkimut atoqqitassanngorlugit nassiunneqartarput, eqqortumillu immikkoortiterneqarsimappata, nassiunnerat akikinnerusarput. Allaat ilaat aningaasanik iluanaarutaasinnaapput, taamaalilluni ataatsimut aningaasartuutit ikinnerunissaannut iluaqutaasarlutik. Kisianni tassa taama iliorniarutta aatsaat immikkoortitereqqaarluta taama iliorsinnaavugut, nassuiaavoq Avannaata Kommuniani avatangiisinut ingeniøri Sam Abedini.
Lastbiilinut oqimaalutaavik nutaaq novembarip aallaqqaataani atulernissaa naatsorsuutigineqarpoq. Aallartisarnerani immikkoortiterineq pillugu kommuni siunnersuerusullunilu ilitsersuerusuppoq.