- Kommunalbestyrelsip Qaanaami ataatsimiinnissaralua qilanaarisimagaluaqaarput, sulisullu marluk ataatsimiinnissamik piareersaajartorniassammata sapaatip akunnerata siuliani siuartillugit aallartereersimagaluarpagut, nakorsaanerulli naliliinera tunngavigalugu ataatsimiinnissaraluamik taamaatitsinissaq pissutissaqarluarsoraarput, tassami innuttaasut tunillanneqaratarsinnaanerat pinngitsoortikkusukkatsigu, Palle Jerimiassen Avannaata Kommuniani borgmesteri oqarpoq.
Innuttaasut akornanni allassaataasumik coronamik tunillatsissimasumik Aasianniittoqalersimanera tunngavigalugu nakorsaanermut tusarniaasoqarnissaa Avannaata Kommuniani borgmesterip kissaatigaa, kommunalbestyrelsillu pilersaarutaasut malillugit Qaanaami ataatsimiinnissaa nalilersikkusunneqarpoq. Nakorsaanerup Henrik L. Hansenip akissutaa ersarippoq:
- Ilulissat Danmarkimit allaniillu tikinneqarnerpaasartuni tullersortaavoq, Nuuk siulersortaalluni. Kommunalbestyrelsimi ilaasortat angalasunik taakkuninnga attaveqanngitsoorsinnaanngillat. Taamaammat angalaqatigiit taama amerlatigisut Qaanaamut angalanissaat eqqarsarnartoqarpoq. Tamatumunnga ilutigitillugu Qaanaaq sumiiffinnut tuniluunnermik akiuinissamut periarfissaqanngitsunut ilaavoq. Misileraatinik atortussanillu naleqquttunik peqanngilaq. Tamatumanilu Qaanaami innuttaasunik navianartorsiortitseratarsinnaaneq eqqarsaatigilluassagissi siunnersuutigaara.
Kommunalbestyrelsip Qaanaami ataatsimiisinneqarsinnaanera taamaatinneqavinngilaq.
- Upernaaru kommunimut qinersinissaq pitinnagu Qaanaami ataatsimiissinnaaneq naatsorsuutigaarput, maannamuugallartorli Qaanaami innuttaasut illersornissaat pingaarnerutittariaqarparput, brogmesteri Palle Jerimiassen oqarpoq.
Avannaata Kommuniata kommunalbestyrelsiani ilaasortat 17-iupput.
Allattoq: Káte Hansen, khan@avannaata.gl