- Suliffeqarfiit ilaanni atiinik taarusunngisatsinni sulisut teriannianik nerisitsisarnerat, taamalu illoqarfimmut qanillattuinissaannut sungiussisitsisarnerat pitsaanngilluinnartuuvoq. Pingaartumik qimmit piaqqat suli pitussimanatillu kapitissimanngitsut teriannianit perlerortunit qaninngoorneqarnermikkut perlerornermik tunillanneqarsinnaapput, taamaasillutillu qimmit allat nalaatsortumik aamma tunillanneqarsinnaallutik. Taamaammat teriannianik nerisitsisarneq silatusaarnerunngitsoq sulisuminnut erseqqissaatigalugulu unitsikkasuaqqussagaat suliffeqarfinnut kajumissaarutigissavarput, Ilannguaq Hansen Ilulissani qimmilerisut ataqatigiissaarisuat oqarpoq.
Qimmilerisut innuttaasunit teriannianik illoqarfimmi takunnissimasunit ilaatigut sianerfigineqartarput. Taamaasillutik terianniat arlallit Nuussuattaami Hotel Arcticip ataatungaaniittut aammalu eqqaavissuarmi takuneqartarsimapput, soorluttaaq aamma terianniat illoqarfimmiittut assingi najukkami attaveqatigiittarfinni takussaaleraluttuinnarput.
- Terianniat nerisinneqaraangamik illoqarfimmut appakaatsinnissaannut sungiussitinneqartarput, taamaasillutillu qimminut inunnullu nujuitsunngorsinneqartarput. Taamaammat innuttaasut teriannianik kalerriutaat pimoorulluinnartarpagut, terianniallu arlalikasiit maannamut aallaallugit toquttariaqarsimavagut, Ilannguaq Hansen ilisimatitsivoq.
Qimmilerisunut ataqatigiissaarisoq oqaluttuarpoq terianniat silassorinnerat peqqutigalugu pisariniartarnerat ilaatigut ajornakusoorsinnaasartoq. Namminerlu ataasiarluni terianniamik illoqarfiup illuatungaaniit illuatungaanut itigarluni malersuisimagaluarpoq, tassalu Atersuit nalaanniit Sermermiut tungaannut.
- Allaat siorna qimmip pitussimasup terianniaq uiartorlugu toqussimavaa, sunaaffa perlerortoq. Qujanartumik qimmeq perlerornermut akiuussutissamik kapitissimagallartillugu tunillatsinngilaq. Aamma piffissami allami angut illoqarfiup avataaneersoq tulattarfimmi terianniamit qaninngoorneqarsimavoq. Angutip terianniaq aallaallugu toqussimavaa, taannalu aamma perlerortuusimavoq. Taamaammat suliffeqarfiit teriannianik nerisitsisarunnaaqqullugit kajumissaarnissaannut peqqutissaqarluarpugut, Ilannguaq Hansen inerniliivoq.
Allattoq: Káte Hansen, khan@avannaata.gl