- Avannaata Kommuniata aammalu Namminersorlutik Oqartussat akornanni allaffissornikkut paatsooqatigiittoqarsimanera pissutigalugu siusinnerusukkut pisortaqarfinnit nalunaarutigaarput,
nunaqarfimmiut qaqqap nakkaateratarsinnaaneranik aarlerinartorsiorneq pissutigalugu nunaqarfimminnit nuunniarlutik kissaateqartut illutik qimassagaat kingusinnerusukkullu isaterneqarumaartut.
- Ineqarnermut Attaveqatigiinnermullu Pisortaqarfimmi atorfilittanik ullumi ataatsimeeqateqareerluta inerniliivugut, nunaqarfimmiut nunaqarfimminnit nuunniarlutik kissaateqartut illutik pigiinnassagaat, taamalu illut isaterneqassanngitsut, Nick Nielsen Avannaata Kommuniani pisortaaneq oqarpoq.
Illunik isaterisorqarnissaanik siusinnerusukkut nalunaaruteqarneq nunaqarfimmiut akornanni ernumatitsilersimavoq.
- Kommunitta aammalu Namminersorlutik Oqartussat akornanni paatsooqatigiittoqarsimaneq nunaqarfimmiuni ernumatitsilersimasoq soorunami ajuusaarutigaarput. Maannali tassa nunaqarfimmiut qaqqap nakkaateratarsinnaaneranik aarleqquteqarlutik nuukkusuttut illutik pigiinnartussanngoramikkit aarlerisariaarupput, kommunimi pisortaaneq oqarpoq.