Upernavimmi atuarfik ulluni 14-ini matoqqareerluni ammaqqissasoq

- Upernavimmi innuttaasut atuarfiup ammaqqinneqarnissaanik noqqaasuupput. Taamaammat Inerisaanermut Ataatsimiititaliami siulittaasup Lena Ravn Davidsenip kissaateqarneratut atuarfiup ammaqqinneqarnissaa Nunatsinni Nakorsaaneqarfimmut noqqaassutigaarput, tamannalu maanna akuersissutigineqarpoq, Aka Grønvold Ilinniarnermut Ingerlatsivimmi pisortaq oqarpoq.

Upernavimmi atuarfik illoqarfimmi coronamik tuniluuttoqangaatsialersorlu novembarip 23-ani matuneqarpoq, atuartullu coronamik ersiuteqaratarsinnaasut misissortinnissamut kaammattorneqarput. Angajoqqaallu inuiaqatigiinni pinngitsoorneqarsinnaanngitsunik suliffillit suliinnarsinnaaniassammata ulluunerani paaqqinittarfinniittut atuartullu 1. klassemiit 7. klassemi atuartut ajornartoornermi paarineqarnissaannik ullormi tassani aamma periarfissinneqarput.

Illoqarfimmi peqqinnissaqarfik artukkerneqarpallaalermat Upernavimmi innuttaasut angerlarsimaannarnissaat novembarip 24-ani kaammattuutigineqarpoq.

- Atuaqatigiiaat tamarmik coronamik tuniluuffiupput ilinniartitsisullu ataasiakkaat aamma coronamik tunillatsissimallutik. Taamaammat atuartut ataasiakkaaginnaat ajornartoornermi paarineqartarput ilaatigullumi allaat paarisassanik aggertoqartarani. Maannalu atuarfiup ammaqqinneqarnissaanut akuerineqarpugut ilinniartitsinerillu nangeqqissinnaanngorpagut, Aka Grønvold oqarpoq.

Prinsesse Margrethe Skolen-imi ilinniartitsisut 22-t atuartunut 180-inut ilinniartitsisarput.

Nunatsinni coronap tuniluunnera pillugu paasissutissat kingulliit uani paasisaqarfigisinnaavatit: https://corona.nun.gl/kl/

Allattoq: Káte Hansen, khan@avannaata.gl
Asseq: Toqqorsivimmit