Tamat Oqartussaaqataanerat Nunaqarfinnilu Ineriartortitsinermut Ataatsimiititaliaq Uummannap eqqaani nunaqarfiit tallimat tikeraarsimavaat naapeqatigalugillu. Tikeraarnerup nalaani Nunaqarfinni Aqutsisut innuttaasullu ataatsimeeqatigineqarput ataatsimiititaliarlu illunut allaffinnullu pulaartaqattaarput.
Tikeraarnerit naapeqatigiinnerillu ataatsimiititaliap ilaasortaanut nunaqarfinni kissaatinut ineriartortsitsisussanut iluarsaatassanullu paasisaqarfiuvoq. Kommunip allaffiinut tunngasunut pissutsit sammineqarluarput. Illut pisoqaapput aserfallassimallutillu arlalinnilu silaannarissartarfiluppallaaqaat, arlalinni oqoqarpoq aamma iluarsaatassat annikitsut iluarsaanneqartarsimanatik.
Nunaqarfinni kissaatit ilaatigut tassaapput multihali, inuusuttunut inissiat, aqquserngit aamma umiarsualiviit/nunniukkat pitsaanerusut. Kisaatigisat amerlasuut atortussallu nutaat iluarsaatassallu tikeraarnermi katersorneqartut, taakkulu ataatsimiititalianut attuumassutilinnut suliassanngorlugit ingerlateqqinneqassapput.
Avannaata Kommuniata Kommunalbestyrelsiata aalajangiiffiginikuuaa, siunissami 2023 aallarnerfigalugu sumiiffinni innuttaasut amerlassusaat naapertorlugu sanaartornermut aningaasaliissutissat agguaanneqartalernissaat. Tassa imaappoq Uummannap eqqaani sanaartornermut ukiumut aningaasat milliuunilikkaat ukiunut tallimanut qulakkeerneqassasut.
Tamat Oqartussaaqataanerat Nunaqarfinnilu Ineriartortitsinermut Ataatsimiititaliaq kommunimi nunaqarfinnut angalanertik nangillugu nunaqarfinnut allanut tikeraassapput.
”Qinigaaffimmi matumani nunaqarfiit tamaasa tikeraarusuppagut. Maanna angalanitsinni piffissakillioratta taamaattumik siunissami tikeraartarnissagut sivittorniarsariniarpagut, naapeqatigiinnissaq piffissaqarfiginerujumallugu”,Upernavimmi qinigaq Tamat Oqartussaaqataanerat Nunaqarfinnilu Ineriartortitsinermut Ataatsimiititaliami siulittaasoq Knud Kleemann oqarpoq
Ataatsimiititaliap nunaqarfiit tallimat uku naapeqatigaat: Ikerassak, Niaqornat, Qaarsut, Saattut aamma Ukkusissat
Kikkut Tamat Oqartussaaqataanerat Nunaqarfinnilu Ineriartortitsinermut Ataatsimiititaliami ilaasortaanersut takukkit.
