Nunanit allaniik suliartortut kalaallisut ilinniartut
”Sumi sulisarpit?”
”Brugsenimi sulisarpunga”. Malou aallussisorujussuuvoq, kalaallisut tulleriiariniarluni.
Uani pingasunngornermi suliassaq siulleq tassa, akunneq aallartillugu tamarmik qanoq ateqarnertik oqaluttuarissallugu aammalu qassinik ukioqarnertik sumilu sulinertik.
Kalaallit oqaasii kiisalu qanoq taajoriaasii oqaaseqatigiiliornerlu annertuumik sungiusartariaqarput, unnukkut atuartitsinermi peqataasut isumaqarput. Bruce aallunneri imminut akilertarput.
”Kalaallit oqaasii ilikkarusoqaakka Brugseni-mi sulisinnaaniassangama pisiniallu sullillugit, oqaloqatigisarusukkakkit paasillugillu, qanoq oqaluttuunneraannga,” 35-nik ukiulik Malou A. Jose oqaluttuarpoq.
Malou peqqissaasutut ilinniagaqarpoq ukiualunnilu Bahrain-imi peqqissaasutut sulisimalluni nunatsinnut uinilu Bruce Jay P. Jose, tikinngikkallaramik. Bruce assassorluni sulisartuuvoq KJ-imilu sulilluni.
”Maaniilluni nuannerpoq maanilu najugaqaannarusuppugut. Taamaattumik qujamasuutigeqaarput kommune kalaallisut unnukkut atuartitsinermik neqerooruteqarmata. Aamma neriuutigaarput, unnukkut atuartitsineq qallunaatut ingerlanneqalissasoq, taamaalilluni Malou peqqissaasutut sulilersinnaaniassammat,” Bruce oqarpoq.
Avannata Kommunia Ilulissani atuaqatigiiaat pingasut kalaallisut ingerlapput. Atuaqatigiiaat marluk qallunaatut oqaluttunut pingajuallu tuluttut oqaluttunut.
”Royal Greenlandimi sulivunga suleqateqarluarlungalu, tamaammat oqaatsiisa ilinniarnerisigut ataqqinninnera takutikkusuppara. Unnukkut atuarsinnaatitaalluta kalaallisut ilinniarsinnaanerput assut pitsaaqaaq,” taamatut oqarpoq 35-inik ukiulik Christian Reyes, Royal Greenlandimi Operatoriusoq.
Nuliarivaa Pamela Ignacio-Reyes, aamma Royal Greenlandimi sulisuusoq. Marluullutik Filipiineriupput ukiunilu tallimangajanni Ilulissani najugaqarlutik sulisimallutik, maanilu najugaqaannarusupput.
”Maaniinnerput assut nuannaraarput. Atuareernitta kingorna suleqatigullu allaffimmi ilinniartarpugut. Pikkorinnerulernissatsinnut assut ikiuukkusupput annerusumillu kalaallisut oqalussinnalernikkut suleqatitsialaanerulissuunga,” oqarpoq Pamela Ignacio-Reyes, Royal Greenlandimi rajalerinermi Quality Manageritut sulisoq.
”Neriuutigaarput aamma qallunaatut ilinniartitsisoqartalissasoq” inuusutut takku marluk oqarput, ilaallu eqqaanniitut anngaapput.
Unnukkut atuartitsinermi arlalinnik Avannaata Kommunia neqorooruteqarpoq, assersuutigalugu sananeq, aallartillaanut spanskisut oqaatsit, qilaasersorneq aamma sapangaaqqanik iverusiorneq -2022/2023-imi unnukkut atuartarneq akeqanngilaq.
