Mannissarneq

Kalaallit Nunaat tamarmi timmiaqarpoq, imaani, sineriammi nunatannilu isorliusuni sermersuup sinaani. Sermersuaq kisimi timmissanit najorneqanngilaq.

Kalaallit Nunaanni timmissat assigiinngitsut 60-it missaanniipput. Affai ukiukkut Kalaallit Nunaat qimallugu ukiiartortarput.

Matumani takusinnaavatit mannissarnissamut piumasaqaatit suut atuunnersut, matumani timmissat sorliit mannii, qaqugu aammalu sumi.

Kommunerisanni mannissartarnermut kommunimit immikkut ittunik ileqqoreqqusaqartitsisoqarsinnaavoq. Ileqqoreqqusallu mannissannginninni ilisimaarinissaanut pisussaaffeqarputit.

Mannissaat inuussutissarsiutigalugu namminerluunniit atugassaagaluarpata, Piniarneq atorlugu ukiumoortumik nalunaarutigisartussaapput, tassa timmissat Piniarneq-mi pisat nalunaarsorneqarnissaannut immersuiffimmi takuneqarsinnaappata.

Aallaaviatigut mannissarneq inerteqqutaavoq. Mannissarniaruit sunngiffimmi aamma inuussutissarsiutigalugu piniarnermut allagartamik atuuttumik peqassaatit.

Mannissarnermi atugassat inerteqqutaasut tassaapput:

• Allunaasaq
• Tummeqqat
• Innartorluni pituutaq imaluunniit innartorluni atortut allat

Aammattaaq ullut nutaat imaluunniit timmiaqarfiit, manniit aamma timmissat piaraat timmissallu nujuartat ajoqusissanngillat imaluunniit akornuserneqassanngillat.

Timmissanit sorlernit mannissarsinnaanerit qaqugulu, apeqqutaavoq sumi najugaqarnerit.

Sunngiffimmi imaluunniit inuussutissarsiutigalugu piniarnermut allagartaqaruit nammineq atugassannik:

• Qaqulluup, tulukkat, naajarluit, aamma naajarujussuit manniinik piffissami 1. april aallarnerfigalugu 15. juni tikillugu mannissarsinnaavutit
• Nunap immikkoortuani zone 1-imi najugaqaruit mitit siorartuut aamma mitit siorakitsut manniinik ileqqutoqqat malillugit manniusiornermut piffissami 15. junimiit 25. juni ilanngullugu mannissarsinnaavutit
• Nunap immikkoortuini zone 1, zone 4 aamma zone 5-imi najugaqaruit manniliornerup nalaani appaliarsuit manniinik mannissarsinnaavutit

Inuussutissarsiutigalugu piniarnermut allagartaqaruit tunisaqarnissamut siunertaqarlutit:

• Naajat manniinik mannissarsinnaavutit Manniit uunneqanngitsut suliarineqanngitsullu pisisussamut taamaallaat tunisinnaavatit aamma aqutsiveqarfimmi najugarisanni taamaallaat.

Matumani taaneqartut saniatigut allat manniinik mannissaqqusaanngilatit. Tassa appat imaluunniit imeqqutaallat manniinik mannissarneq inerteqqutaavoq, taamaaliornerlu akiliisitsinermik pineqaasitsissutaasinnaalluni.

Mitip siorartuup aamma mitip siorakitsut ulluanit ataatsimit amerlanerpaamik marlukkaarlugit minnissarsinnaavutit piffissami apriilip aallaqqaataaniit juunip 15-iat ilanngullugu.

Timmissat sumiiffii 40-it illersugaapput. Sumiiffinnit taakkuninnga 500 meter-it iluini 1. maj aallarnerfigalugu 31. august tikillugu angalaqqusaanngilatit.

• Timmissanik piniarneq – sunngiffimmi piniartunut