Kapisilinnik sunngiffimmi aalisarniaruit aalisarsinnaanermut akuersissummik atuuttumik peqassaatit.

Quppernermi uani kapisilinnik aalisarnissamut piumasaqaatit malittarisassallu immikkut ittut pillugit atuarsinnaavutit.
Aalisarnermut malittarisassat piumasaqaatillu aalajangersarneqarsimasut malinnissaannut pisussaaffeqarputit. Taakkunani ileqqoreqqusat angerlarsimaffittut kommunerisanni immikkuullarissinnaasut, soorlu sumiiffinnut eqqissisimatitanut illersuisut, aamma atuutsinneqarput. Kommunini ileqqoreqqusat pillugit paasisaqarnerusinnaavutit, uani: inatsisit.gl

Sunngiffimmi aalisartutut nalunaartarnissamut pisussaaffeqarputit.
Qassutitit tamatigut napittaajarneranni kapisillit pisatit nalunaarutigisassavatit. Pisaqarsimanngikkaangavit (0-mik) imaluunniit aalisariarsimanngikkaangavit aamma nalunaaruteqartassaatit.

Sinerissap qanittuani kapisilinniarnermi Kalaallit Nunaat tamakkerlugu ataatsimut pisassiissutit aalajangersaaffigineqartarput, taakkulu inuussutissarsiutigalugu aalisartunut saniatigooralugulu aalisartunut agguaanneqartarput. Kapisilinniarneq pisassat nungunnissaasa tungaanut ingerlanneqartarpoq, tassanilu sunngiffimmi aalisartut tamarmik pisassiissutinit taakkunanit aalisartarput. Pisassiissutit tamarmik aalisarneqarneqareeraangata aalisarneq unitsinneqartarpoq.

Aalisarsinnaanermut akuersissut ukunani atuuppoq:

• Sumiiffimmi killilikkami ataatsimi,
• Ukiumi ataatsimi januaarip aallaqqaataaniit decembarip 31-ianut, imaluunniit
• Piffissami aalisarfiusumi ataatsimi Aalisarnermut Piniarnermullu Naalakkersuisoqarfimmit nalunaarutigineqartumi.

Atlantikup kapisilianik aalisarnermut aqutsinissamik pilersaarut aallaavigalugu ingerlanneqartarpoq.

Una toorlugu Kalaallit Nunaanni Atlantikup kapisilianik aalisarnissamut aqutsinissamik pilersaarut atuarsinnaavat

Sunngiffimmi aalisartutut aalisarsinnaanermut akuersissut pillugu qinnuteqarsinnaanermut piumasaqaatit makku naammassisimassavatit:

• Kalaallit Nunaanni akileraarutinik akiliisarputit, ukiunilu kingullerni 2-ni akiliisarsimallutit
• Kalaallit Nunaanni najugaqartuuvutit, ukiunilu kingullerni 2-ni najugaqartuusimallutit
• Qassutit kapisilinniutit nammineerlutit pigissavatit.
• Umiatsiaaqqamik angallammilluunniit nammineerlutit pigisaqarputit, taakkulu takissutsimikkut annerpaamik 12,8 meteriussapput (42 fod).
• Pisarisimasatit ukiup siulianeersut piffissaliussaq qaangiutsinnagu nalunaarutigisimavatit (akuersissummik pigisaqarsimassaguit)

Sumi najugaqartuunissamut piumasaqaammit immikkut akuersissuteqartoqarnissaa pillugu qinnuteqarninni periarfissaqarputit. Paasisaqarnerorusukkuit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik attavigineqassaaq.

Kapisilinniarneq aqutsiveqarfinnut sisamanut aggulunneqarpoq:

• Kitaata avannaa (64°15' N-p avannaani)
• Nuuk – Paamiut (64°15'N kujaani)
• Kitaata kujataa (60°45' N-p kujataani)
• Kalaallit Nunaata kangia (sineriak tamakkerlugu)
• Kapisillit kuuat (pineqartut tassaapput kuummi tasinngortanilu kiisalu kuup akuanit 1000 meterinit ungasinnerusumi aalisarnerit)
  
  

Qinnuteqaruit sumiiffik akuersissuteqarfiusussatut kissaatigisat toqqassavat.

Malugalugu: Kapisillit kuuani tasinngortanilu aamma kuup taassuma akuanit 1000 meterisut ungasitsigisumiittut kapisillit Nunatta nammineq kapisiligivai aamma kapisillit aqutsiveqarfimmi tassani pisarineqartartut Atlantikup kapisiliinik pisassiissutinit aqutsiveqarfinni allani aalisarneqartartunit ilanngaatigineqartanngillat.

Naalakkersuisut kapisilinniarnermut piffissarititaasoq KNAPK siunersiorlugu ataani allaqqasut malillugit aalajangertarpaat.

Aqutsiveqarfik:	Aalisarnermi piffissarititaasoq:
Avannaata kitaani	1/9 - 31/10
Nuuk – Paamiut	1/8 – 31/10
Kujataata kitaani aamma Kapisillit	1/8 - 30/9
Tunu	15/8 – 15/10

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmiit nalunaaruteqartoqareerpat aalisarneq aallartissaaq, pisassiissutillu aalisarneqareerpata unissalluni.

Sunngiffimmi kapisilinniarnermi atortut uku atoqqusaapput:

1. Qarsorsat, imaluunniit
2. qassutit katitigaanermikkut annerpaamik 45-meterinik takissusillit nigartai siaarlugit
3. minnerpaamik 140 mm-isut. Qassutit arlallit uiguleriissitat atorneqarnissaat inerteqqutaavoq
   
   

Kapisillit kuuat immikkut
Kapisillit kuuanni tassanilu tasinngortani aamma kuup akuanit 1000 meterimik ungasitsigisumi qarsorsat qissattaatilluunniit taamaallaat atorneqarsinnaapput. Kapisillit Kuuata paavani 1000 meter-imit qaninnerusumut qassuserneq inerteqqutaavoq.

Qassusersornermi malittarisassat

• Aalisarnermi atortuutit piginnittup atianik ersarissumik nalunaaqutserneqarsimassapput. Nalunaaqutsiinerit imermit arrortinneqarsinnaassanngillat.
• Kangillersimanerit, kangerliumarnit ikerasaallu qassutinit asserneqassanngillat. Imaatigut angalasoqarsinnaanera aamma mianersuutigineqassaaq.
• Qassutit kapisilinniutit qassutinut tullernut minnerpaamik 30 meterinik akunnilerlugit nivinngarneqartassapput.
• Kuup akuanit minnerpaamik 500 meterinit ungasissusilimmi qassusertassaatit.
• Qassuserfigisavit matuneqannginnerani qassutitit qaqissavatit. Aalisarnerup matunissaa tusagassiorfitsigut alaatsinaassavat.
  
  

Malugiuk: Qassutit tissukartittakkat atorneqaqqusaanngillat.

Kapisilinniarsinnaanermut akuersissummik qinnuteqarniaruit nammineerluni immersuinissamut toortagaq sungaartoq "Ugguuna qinnuteqarit" quppernermi uani qullerpaamiittoq atorlugu qarasaasiakkut qinnuteqarsinnaavutit. Immersuiffissaq qarasaasiakkut immersorniarukku nassiunniarukkulu "Immersoruk nassiullugulu" toqqaruk.

Nammineerluni immersuiffissaq/web-i atorniarukku nammineerlutit MitID-risat atorlugu isissaatit.

Ikiortariaqaruit kommunerisannut saaffiginnissinnaavutit.

Malugiuk: Kapisilinniarsinnaanermut akuersissutaateqarsimaguit, pisatillu ukiup siuliani nalunaarutiginngitsoorsimagukkit, ukiumi pineqartumi kapisilinniarsinnaanermut akuersissummik tunineqarsinnaanngilatit.

Kapisilinniarsinnaanermut akuersissummik qinnuteqarniaruit qinnuteqarnermut immersugassaq immersorsinnaavat.

Toortakkap sungaartup ”Ugguuna qinnuteqarit” atorneratigut imaaliorsinnaavutit:

• Qinnuteqaat anisinniarukku "Anisiguk" toqqassavat, assannik allallugu immersussavat tunniunniarukkulu (MitID-qarnissaq pisariaqanngilaq).

Immersuiffissaq najukkanni innuttaasunik sullissivimmut imaluunniit nunaqarfiup allaffianut tunniutissavat.

Qinnuteqaatit nassiutereerukku aalisarsinnaanermut akuersissummik suliaqarneq aallartissaaq.

Qarasaasiaq atorlugu qinnuteqarsimaguit qinnuteqaatit Aalisarnermut Piniarnermullu Naalakkersuisoqarfimmut toqqaannartumik nassiunneqassaaq, tassaniittullu qinnuteqaatigisat suliarissavaat. Qinnuteqaativit tigusimaneranik uppernarsaammik mailikkut tigusaqarumaarputit.

Qinnuteqaammik immersugassaq anisereerukku immersorlugulu qinnuteqaatit Aalisarnermut Piniarnermullu Naalakkersuisoqarfimmut kommunip ingerlateqqissavaa, Naalakkersuisoqarfimmilu qinnuteqaatit suliarineqassaaq.

Taakku marluk pineqartillugit qinnuteqaat Aalisarnermut Immikkoortortaqarfimmi sulianik suliarinnittartumut attuumassutilimmut ingerlateqqinneqarumaarpoq.

Qinnuteqaatinnik suliaqarneq ullut suliffiusartut qulit missaannik sivisussuseqassaaq. Qinnuteqaativit suliarineqarnissaanut paasissutissat amigarpata attavigineqarumaarputit.

Mailimut qinnuteqarfissannit qinnuteqaatip akuerineqarsimanera itigartitsissutigineqarsimaneraluunniit akissutigineqarumaarpoq.

Qinnuteqaatit kommunimut tunniutereersimagukku qinnuteqaatit akuerineqarsimanersoq imaluunniit itigartinneqarsimanersoq pillugu kommunimit akissutisiumaarputit.

Kapisilittatit tamaasa Kalaallit Nunaanni Aalisarnermut Pinianermullu Nakkutilliisoqarfimmut (KANUAPNA-mut) TAMATIGUT nalunaarutigisassavatit, napittaajaareernermi imaluunniit qarsorsanik qissataammilluunniit pisaqarsimanerit kingorna.

Pisaqarsimanngikkaluaruilluunniit nalunaartartussaavutit (0-mik). Kapisilinniarsimanngikkaluaruilluunniit aamma nalunaartartussaavutit.
Piffissap aalisarfissap naammassereerneranit kingusinnerpaamik ullut 14-t kingorna KANUAPNA-mut nalunaaruteqarsimanngikkuit ukiup tulliani akuersissummik tunineqarsinnaassanngilatit.

Kapisilittavit nalunaarutigineqarnissaannut una tooruk

Aqutsiveqarfimmi attuumassuteqarfigisanni aalisarnerup uninnissaata tungaanut kapisilinniarsinnaanermut akuersissummik qinnuteqarsinnaavutit.

Malugiuk: Pisanik nalunaartarneq ullut tamaasa pisassaaq. Aalisarnerup unereernerata kingorna kingusinnerpaamik ullut 14-it qaangiunneranni nalunaartarnissaq piffissaliussaavoq. Piffissaliussaq kapisilinnik pisaqarsimanngikkuit kapisilinnillu aalisarsimanngikkuit aamma atuuttussaavoq.

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup aalajangigai naammagittaalliuutigineqarsinnaanngillat.

• Kapisilittatit nalunaarutigikkit