Dronning Margrethep 80-iliinissaanut persuarsiussamaarput

Persuarsioqataasussat ilagaat William Halsøe 77-inik ukioqartoq kunngikkormiunillu nuannarisalik.

- Kunngikkormiunik pingaartitsineq ilitsoqqussaraara, taamaammallu ataqqinartorsuaq 80-iliippat utoqqaat illuanni persuarsiutigineqassammat qujanaqaaq nuannissallunilu, William oqarpoq.

Persuarsiornissaq pillugu Utoqqaat Illuat Unganartoq-mi aqutsisuusoq Rachel Reimer Jensen oqarpoq:

- Ataqqinartorsuup dronningip 80-inik ukioqalernissaanut atatillugu ullormi inuuissiornerani najugaqartut sulisullu peqataaffigisaannik erfalasumik ullaakkut arfineq-pingasunut amusissaagut. Ualikkut pingasut qeqqanut kaffillissaagut lagkagitalimmik. Ulloq nuannersumik malunnartinniarlugu inersuarmi erinarsoqattaassaagut, dronngillu inuuissiornissaata nalliussinissaa qilanaaraarput.

Dronning Margrethe uigigalualu prins Henrik 2015-imi nunatsinnut tikeraarnerminni Ilulissani puiortunngortunut angerlarsimaffittaap atoqqaarfissiortinneqarneranut atatillugu pulaarput. Taamani angerlarsimaffimmi najugaqartut aammalu illoqarfiup utoqqartai pisinnaasut tamarmik persuarsiorlutik najuupput, tamarmillu ataasiakkaarlutik dronningimit uianillu assamminneqarput.

- Taamani qaqortumaarlungalu qernertunik qarlimaarpunga. Ataqqinartorsuaq uialu assammillugit aamma allatut misigisassaavoq, nuannersorsuuvoq killitsinnarlunilu. Taamani aappassaa assammippakka, siusinnerusukkut Nuummiimmata aamma assamminnikuuakka, William Halsøe unnersiorpoq.

Nualluut Covid-19 pissutigalugu dronningip inuuissiornissaata nalliussineqarnissaa kommunimit pilersaarusiorneqarsinnaasimanngilaq, taamaattorli Ilulissani arsaattarfimmi katersuunnikkut innuttaasut inuuissiortoorlutik erinarsoqatigiinnissaannut aqagu sisamanngornermi apriilip 16-iani nal. 12.00 periarfissinneqarput, taannalu Avannaata Kommuniata Facebookiatigut toqqaannartumik aallakaatinneqassaaq.

Allattoq: Káte Hansen, khan@avannaata.gl
Assit: Avannaata Kommunia