- Coronamik tunillatsissimasut arfinillit Ilulissani paasineqarnerisa kingorna mianersorpallaarsinnaanngilagut. Taamaammat peqatigiiffiit, suliffeqarfiit allallu annertuumik katersuuffiusinnaasumik aaqqissuussaqartut aaqqissuussaminnik taamaatitsissasut kaammattorpagut, borgmesteri Palle Jerimiassen oqarpoq.
Atuarfiit, meeqqeriviit assigisaallu ammaannassapput.
- Angajoqqaat atuartuutillit, meeraaqqerivinniittuutillit meeqqerivinniittuutillillu coronamik tunillatsissimasut arfinillit Ilulissani paasineqareernerisa kingorna sianertalerput paasiniaallutillu qanoq iliussanerlutik, Aka Grønvold Ilinniarnermut ingerlatsivimmi pisortaq oqarpoq nangillunilu:
- Atuarfiit, meeraaqqeriviit, meeqqeriviit, atuagaateqarfiit aamma timersortarfiit nalinginnaasumik ammaannassapput. Kommunip suliffeqarfiutaani tamani sulisut tuniluuttoqarnissaa pinaveersaarniarlugu nakorsaaneqarfimmit innersuussutinik maleqqissaarinnissapput. Aamma atuarfinniit atuartut agguataarlugit juullip tungaanut naalagiarnissat ingerlatiinnarneqassapput.
Allattoq: Káte Hansen, khan@avannaata.gl