Namminersorlutik Oqartussat Nakkutilliinermik Ingerlatsiviata iluarsisassatut piumasaqaataanut 28-usunut akissutissat kommunalbestyrelsimi maajip 26-ani immikkut ittumik ataatsimiittoqarnerani kommunalbestyrelsimi ilaasortanit oqaluuserineqarneranni taamatut inerniliussassatut oqariartuuteqartoqarpoq.
Nakkutilliinermik Ingerlatsivik Isumaginninnermut, Ilaqutariinnut Inatsisinullu Atuutsitsinermut Naalakkersuisoqarfiup ataaniittoq Upernavimmi Ilulissanilu isumaginnittoqarfiup iluani meeqqanik tapersersuinermut tunngassuteqartuni malittarisassanik siorna septembarimi novembarimilu nakkutilliiartorpoq.
Nakkutilliinermik Ingerlatsiveqarfimmeersut nakkutilliinerannit nalunaarusiaq Avannaata Kommunianut 2021-mi januaarip 21-ani isummerfigisassanngortinneqarmat nakkutilliinermi nalunaarusiami isornartorsiutigineqartunut akissuteqarnissamut qaammatinik marlunnik periarfissiisoqarpoq. Nakkutilliinermik Ingerlatsiviup iluarsisassatut piumasaqaatai katillugit 28-t kommunalbestyrelsimi marsip 26-ani ataatsimiinnermi eqqartorneqarput, tamatumunngalu tunngatillugu kommunalbestyrelsimi ilaasortat Ilaqutareeqarnermut Ingerlatsivimmi sulianik isumaginnittartut marlunnik amerlineqaqqinnissaannik Aningaasaqarnermut Ataatsimiititaliap inassuteqaataa akuersaarpaat.
Kommune pilersinneqarmalli suliniuteqarneq
Kommunalbestyrelsimi ataatsimiittoqarnerani Avannaata Kommuniata ukiut sisamat matuma siorna pilersinneqarneraniit suliniutit aallartinneqarsimasut pillugit Ilaqutareeqarnermut Ingerlatsivimmit ilisimatitsisoqarpoq. Suliniutitigut meeqqanik sullissinermi suliaqartarnerup pitsanngorsarneqarnissaa sulilu pitsanngorsarneqartuarnissaa siunertaavoq. Taamaasilluni Nakkutilliinermut Ingerlatsiviup 2018-imi nakkutilliisimaneranit kommunip Upernavimmi suliassanik naammassinnissimannginneranik isornartorsiuinerata kingorna suliassanik isumaginnittartut angalasartut marluk atorfinitsinneqarput.
Suliassanik isumaginnittartut marluk siorna arfinilinngortinneqarput, taakkulu nunaqarfinnut illoqarfinnullu angalallutik ilaatigut suliassanik ikilisaaqataapput. Illoqarfinni Ilulissanit avannarpasinnerusuni atorfinitsitsiniarneq iluatsissinnaanngimmat suliassanik isumaginnittartut angalasartut pilersinneqartariaqarsimapput.
Suliniutit ilaattut kommunip isumaginninnermut aqutsisoqarfik suleqatigalugu suliassanik isumaginninnermi ingerlatseriaaseq nutaaq suliassanik ikilisaanermi ilapittuutaasussaq atuutilersussanngortilerpaa, piffissamilu matumani isumaginninnermiut siunnersortit qallunaat kommunimi ilitsersuussiartorlutillu siunnersuiartortut angalapput, taamalu suliassanik ikilisaaqataassallutik. Kingullertut taaneqartoq Danmarkip nunattalu suleqatigiinnissamik isumaqatigiissuteqarnerat aallaavigalugu piviusunngortinneqarpoq.
Kommunimi suliniutit ilaattut meeqqanik sullissisartut suliassanik ingerlatsinermi inatsisip tungaatigut ataavartumik piginnaanngorsarneqartuarput, meeqqat pillugit maleruagassialiortoqarpoq, meeqqanut tunngatillugu suliniutinik ingerlatseriaaseq allaaserineqarlunilu titartagartalersorneqarpoq aammalu malittarisassiuunneqarluni, kommunimi illoqarfinni Kullorsuarmilu atuarfinni isumaginninnikkut siunnersortinik atorfinitsisoqassaaq, soorluttaaq aamma ombudsmandeqarfimmit isumaginninnermullu aqutsisoqarfimmit sulisunik pikkorissaasoqarsimasoq.
Kommunalbestyrelsimi ilaasortat inerniliillutik kissaateqarput, isumaginninnikkut akisussaaffeqarfimmi ataavartumik ineriartortoqarnissaa qulakkeerniarlugu suleriaqqinnissamut pilersaarusiortoqassasoq, sulisut pikkorissarluarneqarlutillu atugaasigut pitsanngorsaavigineqassasut kiisalu pinaveersaartitsilluni suliniuteqarneq innuttaasunullu paasititsiniuteqarneq pimoorutivillugu aallartinneqassasoq.
Allattoq: Káte Hansen, khan@avannaata.gl